As redes sociais teñen un impacto cada vez maior na mocidade, tanto positivo como negativo. Por unha banda, son unha ferramenta poderosa para a conexión entre persoas, o acceso á información e a sensibilización sobre temas sociais e políticos. Plataformas como Instagram, Facebook, X (antes Twitter) e TikTok permiten á mocidade expresarse, compartir intereses, coñecer novas ideas e participar en debates construtivos. Estas redes tamén poden ser un espazo onde fomentar a creatividade e a colaboración, creando comunidades arredor de causas comúns ou intereses compartidos. 

Non obstante, o uso excesivo e descontrolado destas plataformas pode ter consecuencias negativas. A presión por mostrar unha imaxe "perfecta", a constante comparación coas vidas dos demais e a exposición ás críticas poden afectar gravemente á saúde mental, xerando ansiedade e diminuíndo a autoestima entre as persoas máis novas. Segundo un informe de UNICEF, as rapazas menores de 21 anos senten maior presión por ter un físico determinado, un 73,5% cree que este tema lles afecta moito ou moitísimo, fronte ao 50,8% dos rapaces. Ademais, a dependencia das redes sociais pode interferir no sono, nos hábitos de estudo e nas relacións persoais, xa que moitos mozos pasan máis tempo en liña que en interaccións directas co seu entorno. De feito, segundo un informe do Ministerio de Asuntos Económicos e Transformación Dixital, o 44,6% dos mozos e mozas estudantes asegurou que o uso destas tecnoloxías quítalles tempo de estudo e baixa o seu rendemento académico. Non só iso,  case o 21% deles considera que a interacción a través das redes sociais xera moitos máis prexuízos que beneficios. 

O obxectivo desta actividade é sensibilizar sobre o uso responsable e crítico das redes sociais e ofrecer estratexias para que mozos e mozas aproveiten as vantaxes das novas tecnoloxías de maneira equilibrada e saudable, fomentando un desenvolvemento persoal e académico que non se vexa afectado pola presión e os riscos asociados ao seu uso.