O ciclo CINEMA BAIXO AS BOMBAS é o novo ciclo de cinema que xorde da colaboración entre a Deputación da Coruña e a Fundación Araguaney-Puente de Culturas. Desde 1984, a fundación, unha organización con sede en Santiago de Compostela, traballa para fortalecer o diálogo intercultural e a comprensión entre diferentes pobos, coa misión de achegar Oriente e Occidente. 

​

Nesta edición de 2025, o ciclo CINEMA BAIXO AS BOMBAS nace co propósito de afondar nos conflitos bélicos actuais. Nun instante no que varios países sofren as consecuencias de guerras, invasións e violencia prolongada, búscase transcender os titulares e as narrativas oficiais para poñer o foco nas historias e experiencias dos pobos que viven baixo a sombra da guerra. Deste xeito, dáselle a voz a quen, desde a imaxe e a memoria, continúa a resistir e a reclamar xustiza.  

​

O ciclo tamén quere visibilizar a través dunha selección de filmes o perigo que supón a guerra e as consecuencias que deixa na poboación civil. Moitas das historias proxectadas exploran o trauma psicolóxico, a perda de fogar e a violencia, subliñando que as feridas máis profundas non sempre son visibles. Estes relatos actúan como un testimuño vivo do custo humano dos conflitos, lembrándonos que detrás de cada estadística hai unha vida, unha familia e unha memoria que resiste a ser silenciada. 

A Fundación Araguaney reafirma o seu compromiso coa cultura como unha ferramenta de transformación social, un medio para o entendemento mutuo e unha defensa inquebrantable da dignidade humana. Nun momento en que a desinformación e a indiferenza ameazan con silenciar as vítimas, o cinema convértese nunha poderosa arma para a empatía e o imaxinario colectivo. 

​

Mantendo o espírito itinerante que caracteriza os proxectos da Fundación Araguaney, o ciclo CINEMA BAIXO AS BOMBAS pon de manifesto o poder do cinema para preservar a memoria, testemuñar o sufrimento e abrir espazos para a esperanza e a resistencia cultural mesmo en contextos de devastación. Deste xeito, ao achegar estas historias ao público galego, se promove un diálogo colectivo en torno á paz, a solidariedade e os dereitos humanos e se reflexiona sobre a responsabilidad de construír un mundo máis xusto e pacífico. 

​

#ACULTURAÉUNDEREITO

​